2024-06-20, Пүрэв
22 C
Ulaanbaatar

Их хотын шилдэг бүсгүйчүүд тодорлоо

Ажил үйлс, хөдөлмөр зүтгэлээрээ түүчээлэн, нийгэм, хойч үедээ үнэ цэн бүтээж буй салбар салбарын шилдэг эмэгтэйчүүдийг НЗДТГ-аас зохион байгуулсан “Их хотын бүсгүйчүүд 2023” хүндэтгэлийн арга хэмжээний үеэр шалгаруулан урамшууллаа.

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

Тодруулбал:

“Энхийн төлөө” номинацид Г.Болор;
“Нийгмийн салбарын шилдэг” номинацид Г. Энхмөрөн;
“Бизнесийн салбарын шилдэг” номинацид Ч. Ганцэцэг;
“Спортын салбарын шилдэг” номинацид О.Саранхүү;
“Боловсролын салбар шилдэг” номинацид Н.Оюунчимэг;
“Эрүүл мэндийн салбар шилдэг” номинацид Л.Арьяасүрэн;
“Алдарт эх” номинацид Б.Бадамханд;
“Хэвлэл мэдээллийн салбарын шилдэг” номинацид Б.Энхцэцэг;
“Соёл урлагийн салбарын шилдэг” номинацид Б.Батцэцэглэн нар тодорсон билээ.
Шагнал гардуулах үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Өнөөдөр энэ өргөө төдийгүй Улаанбаатар хот цэцэг, инээмсэглэлд умбаж, эмэгтэйчүүдийнхээ хайр, халамж, хөдөлмөр зүтгэлээр бахархаж, баярлуулахын төлөө залуус яаран байгаа дүр зураг харагдаж байна. Ээжээрээ, ханиараа, охид, бүсгүйчүүдээрээ улс орон гоёж, бас тэднийхээ хатан ухаан, зөв сургаал, цэгц бодлогыг ч түшиж, тулж хөгжиж ирсэн билээ. Тийм ч учраас энэ өдөр бол бүсгүйчүүд та бүхний маань эрхээ ч хамгаалах, баяраа ч тэмдэглэх өдөр хэмээсэн юм.

Гэр бүл маань 88-уулаа болсон

“Алдарт эх” номинацийн эзэн, 15 хүүхэд төрүүлж өсгөхийн зэрэгцээ улсдаа олон жил үр бүтээлтэй ажилласан Б.Бадамханд:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Би одоо 87 настай, 15 хүүхэд төрүүлж өсгөсөн. Нөхөр С.Нацагдоржтойгоо гэр бүл болсны 55 жилийн ой буюу алтан хуримаа 2008 онд хийж байлаа. Манай гэр бүл өдгөө 88-уулаа болж, би дөрөв дэх үеэ үзэж байна. Үр хүүхдүүд маань эрүүл энх өсөж дээд боловсрол, мэргэжил эзэмшин, ажиллаж, хөдөлмөрлөж байна. Тэднийхээ ач буянаар сэтгэл дүүрэн, сайхан амьдарч явна хэмээн сэтгэгдлээ хуваалцлаа.

Миний ажил бол миний хийх дуртай зүйл

“Эрүүл мэндийн салбарын шилдэг”, Монгол Улсын тэргүүлэх зэргийн эмч, Клиникийн профессор Л.Аръяасүрэн:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Миний хувьд П.Шастины нэрэмжит Улсын III төв эмнэлэгт 2003 оноос хойш ажиллаж байна. Эрүүл мэндийн салбарт ажиллана гэдэг, хүнийг эмчилж эдгээнэ гэдэг тухайн хүнийг эрүүл саруул болгож гэр бүлд нь, аав ээжид нь, ах дүүд нь бэлэглэж байгаа хэрэг юм. Миний ажил бол миний хийх дуртай зүйл. Тиймээс ачаалалтай, амаргүй өдрүүдэд ч түүртэж ядрах нь ховор хэмээв.

Сэтгүүл зүй бол “хүйсгүй” мэргэжил

Хэвлэл мэдээллийн салбарт 27 жил ажиллаж, цаг үеийн нийтлэл, ярилцлага, хөрөг зэрэг төрлөөр олон гайхалтай бүтээл туурвин уншигчид төдийгүй сэтгүүлчдийн талархлыг хүлээсэн сэтгүүлч, “Хэвлэл мэдээлийн салбарын шилдэг” номинацийн эзэн Б.Энхцэцэг:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Арга хэмжээний үеэр сэтгүүлчийн ажлаа хийж явдаг байсан бол өнөөдөр салбар салбарын шилдэг есөн номинацийн нэгээр тодорлоо, их баяртай байна. Сэтгүүл зүй бол “хүйсгүй” мэргэжил гэж би боддог. Энэ талбарт эрэгтэй, эсвэл эмэгтэй байх нь чухал биш, хэн юу хийж чадаж байгаа нь л чухал. Нөгөө талаас хувь хүний үзэл бодол, сэтгэгдэл ч чухал биш. Бид нийгэмд юу зөв байна вэ, юуны тухай ярилцах ёстой юм бэ, юуг олж харах вэ гэдгийг тодорхойлох, мэдрэх ёстой гэлээ.

Өнөөдөр, энд салбараа төлөөлж буйдаа баяртай байна

Бүжгийн спортод 20 гаруй жилийн хөдөлмөрөө зориулсан, “Спортын салбарын шилдэг” номинацийн эзэн О.Саранхүү:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Салбар бүрийн шилдгүүдийн нэгээр шалгарсандаа баяртай байна. Спортын салбарын хувьд хүний эрүүл мэнд, бие бялдрын хөгжилд онцгой нөлөөлдөг, мөн ур чадвар, хүч чадал, тэсвэр тэвчээрийг нь нээн харуулдаг онцлогтой. Энэ салбарт ажиллаж байгаадаа баярладаг, өнөөдөр энд ч салбараа төлөөлж буйдаа талархаж байна хэмээлээ.

Сурагчдынхаа авьяас, чадварыг нээхэд онцгойлон анхаардаг

“Боловсролын салбарын шилдэг” номинацид шалгарсан, Нийслэлийн ерөнхий боловсролын 1 дүгээр сургуулийн физикийн багш Н.Оюунчимэг:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Боловсролын салбарт тасралтгүй 35 жил ажилласан. Багшлах хугацаандаа сурагчдынхаа авьяас, чадварыг нээхэд онцгойлон анхаарч ирсэн, үүний үр дүнд олон шавь маань гадаадын их сургуулиудад тэнцсэн, тэтгэлэг хүртсэн байна. Нийт шавь нартаа, 1 дүгээр сургуулийн багш, ажилтнууддаа, бүсгүйчүүддээ баярын мэнд хүргэе хэмээлээ.

Тусгай хэрэгцээт хүүхдүүдийн төлөө илүү ихийг хийнэ

“Нийгмийн салбарын шилдэг” номинацид шалгарсан Г.Энхмөрөн:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Энэ хүндтэй шагналыг олгож буйд талархлаа илэрхийлье. Тусгай хэрэгцээт хүүхдүүдийн төлөө илүү ихийг хийх, тэдний эрх ашгийн төлөө шаргуу ажиллах урам авч байна, цаашид ч тэднийхээ дуу хоолой болж ажиллана гэсэн юм.

Залуус маань ардын дуугаа сонсож бахархдаг байгаасай

“Соёл урлагийн салбарын шилдэг” номинацийн эзэн, дуучин Б.Батцэцэглэн:

2023 оны гуравдугаар сарын 8. “Их хотын бүсгүйчүүд” арга хэмжээ. ГЭРЭЛ ЗУРГИЙГ Д.ЗАНДАНБАТ/MPA

-Олон улсын эмэгтэйчүүдийг хамгаалах өдрийн мэндийг бүсгүйчүүддээ хүргэе. Ардын урлагт хүч зүтгэж байгаа залуусын төлөөлөл болгож өнөөдөр намайг урамшуулсанд талархаж байна. Залуус маань ардын дуугаа сонсож бахархдаг байгаасай, үгнийх нь сайханд ухааждаг, аяных нь сайханд уярдаг байгаасай гэж хүсэж явдаг гэж сэтгэгдлээ хуваалцсан юм.

- Сурталчилгаа -spot_img

СЭТГЭГДЭЛ

Сэтгэгдэл оруулна уу!
энд нэрээ оруулна уу
Captcha verification failed!
Captcha хэрэглэгчийн оноо амжилтгүй боллоо. бидэнтэй холбоо барина уу!

Санал болгох

- Сурталчилгаа -spot_img